Follow us on:

Republika e Kosovës vendos marrëdhëniet diplomatike me Republikën e El Salvadorit

Nju Jork, 18 tetor 2014 – Në një ceremoni të organizuar në hapësirat e Konsullatës së Republikës së Kosovës në Nju Jork, është nënshkruar marrëveshja për vendosjen e marrëdhënieve diplomatike ndërmjet Republikës së Kosovës dhe Republikës së El Salvadorit.

Marrëveshja është nënshkruar në nivel të shefave të misioneve, respektivisht ndërmjet Konsullës së Përgjithshme të Republikës së Kosovës në Nju Jork, znj.Vlora Çitaku dhe Përfaqësuesit të Përhershëm të El Salvadorit në Kombet e Bashkuara, Ambasador Ruben I. Zamora.

Pas njohjes së Kosovës nga El Salvadori, lidhja e marrëdhënieve diplomatike ndërmjet dy vendeve është një tjetër hap i rëndësishëm që dëshmon interesin politik të dy vendeve për forcimin e miqësisë dhe bashkëpunimit të ndërsjellë ekonomik, kulturor dhe në aspektet tjera. Ky ishte konstatimi i dy përfaqësuesve shtetëror ndërsa ata u pajtuan për intensifikimin e takimeve dhe vizitave bilaterale me qëllim të shfrytëzimit të mundësive me interes të dyanshëm. Po ashtu, duhet nënvizuar faktin që Ambasador Zamora (ish-Ambasador në Uashington DC) ka shprehur gatishmërinë e Qeverisë së tij për të ndihmuar Kosovën në sigurimin e njohjeve të reja nga hemisfera perëndimore e globit.

Me këtë, numri i shteteve me të cilat Republika e Kosovës ka nënshkruar marrëdhëniet diplomatike deri më tani arrin në 70.